<
Rektorati
Rektorati është një organ kolegjial që drejtohet nga Rektori dhe përbëhet nga Zëvendësrektorët e Universitetit të Arteve të Tiranës (UART), drejtuesit e njësive kryesore të UART dhe Administratori i universitetit. Ky organ ka një rol të rëndësishëm në drejtimin dhe zhvillimin strategjik të institucionit.
Rektorati harton planin strategjik të zhvillimit të universitetit duke u bazuar në propozimet e njësive bazë dhe atyre kryesore. Ai propozon hapjen, mbylljen ose riorganizimin e njësive kryesore dhe të njësive të tjera të veçanta. Gjithashtu, shpreh mendimin e tij mbi tematika dhe problematika që prekin funksionimin dhe autonominë e Universitetit të Arteve.
Një ndër detyrat kryesore të Rektoratit është formulimi i kritereve për shpërndarjen e burimeve financiare, materiale dhe njerëzore, si dhe përcaktimi i prioriteteve në plotësimin e kërkesave të njësive të institucionit për financime, mbi të cilat bazohen projekt-buxhetet vjetore. Rektorati paraqet rekomandime në Senat mbi strukturën e përgjithshme organike dhe analitike të universitetit, si dhe mbi numrin e personelit në të gjitha nivelet. Po ashtu, ai harton dhe paraqet në Senat për miratim planin vjetor të veprimtarive akademike dhe kërkimore artistike/shkencore.
Përveç këtyre, Rektorati jep rekomandime në Senat mbi projekt-marrëveshjet, bashkëpunimet apo anëtarësimet e institucionit në organizma ose institucione kombëtare dhe ndërkombëtare. Ai merr masa për zbatimin e vendimeve të Senatit Akademik, si dhe paraqet për miratim kodin e etikës dhe rregulloren e Universitetit të Arteve.
Në rast të ankesave ndaj vendimeve të organeve të ndryshme të fakulteteve, Rektorati ka kompetencën për t’i shqyrtuar dhe për të marrë vendimet përkatëse. Po ashtu, ai trajton dhe zgjidh mosmarrëveshjet mes drejtuesve të njësive kryesore. Përveç të gjitha këtyre përgjegjësive, Rektorati ushtron edhe kompetenca të tjera të parashikuara në statutin dhe aktet e tjera të Universitetit të Arteve.
