<
Doctor Honoris Causa – Giulio Rapetti MOGOL
Sot më 29.09.2023, në ambientet e Universitetit të Arteve u zhvillua ceremonia e dorëzimit të titullit “Doctor Honoris Causa”, tekst shkruesit, shkrimtarit dhe producentit diskografik të mirënjohur Italian Giulio Rapetti ose siç njihet nga të gjithë, MOGOL, pas akordimit të këtij titulli nga Senati Akademik i UART me Vendimin Nr. 35 Dt. 20.09.2023.
Ky titull iu dha me motivacionin: “Për ndihmesën unike për poezinë dhe këngën italiane ndër vite, të cilat përmes vargjeve, ritmeve dhe melodive, së bashku me protagonizmin e zërave të përjetshëm të saj, si misionare të së bukurës dhe të lirisë, depërtuan ngado, por në mënyrë të veçantë, me gjithë pengesat e kohës, arritën të lënë gjurmë të pashlyeshme në ndjeshmërinë, komunikueshmërinë dhe evropianizimin e të rinjve shqiptarë që nuk mplaken”.
Giulio Rapetti MOGOL njihet më së shumti për bashkëpunimet e tij me Lucio Battisti, Gianni Bella, Adriano Celentano dhe Mango. Fama e tij është e lidhur pazgjidhshmërisht me emrin e Lucio Battisti-t, për të cilin shkroi këngë të famshme të konsideruara ndër më të vlerësuarat e klasikeve të muzikës italiane. Padyshim një nga autorët e teksteve më të rëndësishëm në histori, Mogol ka shkruar më shumë se 1500 këngë.
Ceremonia u hap nga Rektori i Universitetit, Prof. Kastriot Çaushi, i cili i njohi gjithë të pranishmit me Vendimin e Senatit Akademik dhe foli mbi punën, veprat dhe figurën e Mogoli-it. Aktiviteti pasoi me disa pjesë muzikore të tij, luajtur nga Pedagogu Andi Kongo, pjesë e stafit akademik të UART.
Në ceremoni nderuan me praninë e tyre përfaqësues të Ambasadës Italiane së bashku me Zv. Ambasadorin Italian, anëtarët e Senatit Akademik të UART, Dekanët dhe stafi akademik i UART si edhe artistë e pjesëmarrës të tjerë të fushës së artit.
Më tej, Rektori i UART, Prof. Kastriot Çaushi, i dorëzoi të mirënjohurit Diplomën “Doctor Honoris Causa” si edhe i dhuroi një punë me portretin e Leonardo da Vinçit, realizuar me mjeshtëri nga Prof. As. Dr. Ardian Isufi, pedagog pranë Fakultetit të Arteve të Bukura.
Fjala e fundit ishte ajo e Dekanit të Fakultetit të Muzikës, Prof. Dr. Isak Shehu, i cili mes emocioneve falënderoi propozuesit e këtij titulli, anëtarët e Senatit Akademik për vendimin e akorduar dhe të pranishmit për pjesëmarrjen.
FOTO GALERI
